durii ke Gam kuchh aur sivaa ho ke rah gaye
ham un se kyaa mile ke judaa ho ke rah gaye
khoye hue the der se vo merii yaad mein
mujh par nazar parii to Khafaa ho ke rah gaye
phir doston ko main ne pai mashq de diye
jo tiir mujh tak aaye Khataa ho ke rah gaye
majabuur ho ke maangii thii lutf-o-karam kii bhiik
lutf-o-karam bhii jor-o-jafaa ho ke rah gaye
ab kyaa rahaa tere liye ai ishq naamuraad
ab vo bhii mubtilaa-e-vafaa ho ke rah gaye
Allaah aaiinaa to kabhii dekh lo 'Khumaar'
tum kyaa the aur ishq mein kyaa ho ke rah gaye
(Khumar Barabankvi)
No comments:
Post a Comment